其實一早收到風，知道係呢兩日嘅事。不過尋晚都係瞓吓醒吓，攪到今朝好遲先返到公司，點知個背影真係畀人攝咗入鏡。搭 lift 嗰陣，咁啱剩得我，同埋叫當奴曾去死嘅字母先生。見到佢，我忍唔住，偷笑。（真係好想叫佢寫番首叫Ｘ小姐去死嘅歌。）不過，如果呢度唔係有咁多問題同漏洞，所有人都未必有時間做到佢哋自己嘅嘥棵蓆。我都要努力漏啲時間出嚟，做啲自己真正鍾意嘅嘢。

同組有兩個合作過嘅編導遭殃，好感慨。或者因為適逢呢啲離別、聚散嘅時刻，令我開始識得稍稍放低自己嘅唔開心。但係要從人哋嘅不幸，先至體會到自己嘅渺小，真係好差勁。正能量呀！我好需要您！

開心嘅事都唔係冇嘅。呢輪睇嘅書、戲，聽嘅唱片，我都幾鍾意。蘇打綠嘅《春．日光》，令我相信流行音樂嘅力量。青峰嘅歌詞真係寫得好好，甚至令我諗番起以前仲有心情寫新詩嘅日子。（雖然亦都難免有種傷逝嘅失落。唉，青春不再。）陳奕迅嘅〈還有什麼可以送給你〉依然傷感。有份提名金曲獎嘅《不想放手》亦都晌我部 i-POD 度繼續播。除咗係咁睇高木直子嘅繪本，又睇咗房慧真嘅散文集《單向街》。佢唔止文筆好，寫嘅嘢仲見到人性黑暗面。可以話，佢比張惠菁更觸動我。電影節結束之後，我都冇乜點睇戲。安東尼奧尼嘅三部曲放咗晌屋企好耐，但始終都未有心情睇。晌戲院睇嘅《迷情》，亦唔算好大衝擊。（不過個女主角咁靚，我一定會睇落去嘅。）許鞍華嘅天水圍系列，我比較鍾意睇落平淡嘅日與夜。呢輪心情咁差，唔想再接觸啲太唔開心嘅戲。夜與霧係好，不過亦都好悲情。除此之外，近來睇多咗日本電影。電影節先後買咗兩次正場都睇唔到嘅《生有時死有時》，結果有賴偉大祖國嘅同胞，粗粗哋睇咗線上版，好鍾意。Lily Franky 個角色好吸引。平凡，唔聲唔聲，已經好幸福。唉，呢個真係「周圍的事」？點解周圍都冇咁好嘅人？亦都睇咗好顛嘅《無厘頭森林之第一次接觸》，有加瀨亮跳騎呢舞呀！爽！可惜《挪威的森林》渡邊一角，最後都係落咗晌大熱松山研一度。菊池凜子做直子？唔知掂咁……

話咁快又一晚。開心的東西要專心記起。

禮物先生會不會脫下高帽子
變出一枝紅玫瑰

當我不再是馬戲班唯一的觀眾
我仍然渴望被獅子馴服
被陽光擁抱
在你盛放的夏天，去愛